මහින්ද සමඟ කරන හොර සාකච්ඡා නිසා එජාපයට වත්මන් ජනාධිපති පිළිබඳ කනගාටුවක්‌ සහ සැකයක්‌ තිබෙනවා

මහින්ද සමඟ කරන හොර සාකච්ඡා නිසා එජාපයට වත්මන් ජනාධිපති පිළිබඳ කනගාටුවක්‌ සහ සැකයක්‌ තිබෙනවා

අකිත පෙරේරා

ජනාධිපති මෛත්‍රීපාල සිරිසේන මහතා හොර රහසේ හිටපු ජනාධිපතිවරයා සමඟ සිදු කරනු ලබන සාකච්ඡා නිසා එක්‌සත් ජාතික පක්‍ෂයට වත්මන් ජනාධිපතිවරයා පිළිබඳව කනගාටුවක්‌, කනස්‌සල්ලක්‌, සැකයක්‌ ඇතිවී තිබෙන බව ඌව පළාත් මහ ඇමැති හරින් ප්‍රනාන්දු මහතා පැවැසීය.

සිරිකොතදී පෙරේදා (29 වැනිදා) පැවැති මාධ්‍ය හමුවකදී හෙතෙම මේ බව කියා සිටි අතර එහිදී ඒ මහතා වැඩිදුරටත් මෙසේද කියා සිටියේය.

අපි පසුගිය දිනවල දැක්‌කා මහින්ද රාජපක්‍ෂ මහතා දිගින් දිගටම පැහැදිලි ප්‍රකාශයක්‌ කළා. ඒ තමයි ඔහුගේ කාලයේ වැරදි සිදුවුණා. ඒ කාලයේදී හොරු ආරක්‍ෂා කළා, හොරුන් හිරභාරයට ගත්තේ නැහැ. එහෙම අතීතයක්‌ ඔහුගේ පාලන කාලයේ තිබුණා කියලා.

එහෙම කියන කෙනකු සමඟ ජනාධිපති මෛත්‍රීපාල සිරිසේන මහතාට එකතුවෙන්න පුළුවන් වෙයි කියලා මම හිතන්නේ නැහැ. ඒ වගේම අපි අවධාරණය කරනවා මහින්ද රාජපක්‍ෂ මහතාගෙන් රටට සිදුවුණු විනාශය පිළිබඳව තමයි මෛත්‍රීපාල සිරිසේන මහතාගේ යහපාලන වේදිකාව තුළ දිගින් දිගටම චෝදනා කළේ. ඒ කාලේ සිදු වූ අඩුපාඩු, වංචා, දූෂණ ගැන කතා කළා. ඒ වගේම ඒ ජනාධිපතිවරණයෙන් පරාජයට පත් වුණොත් තමන්ට අඩි හයක්‌ පොළොව යටට යන්න වෙනවා කියලා මෛත්‍රීපාල සිරිසේන ජනාධිපතිවරයා එදා කිව්වේ.

ඒත් අද අපට පොඩි කනස්‌සල්ලක්‌, කනගාටුවක්‌, සැකයක්‌ ජනාධිපති මෛත්‍රීපාල සිරිසේන මහතා අපට ඇති කරලා තිබෙනවා. ඒ කනගාටුව අපට ඇතිවෙන්නේ, පසුගිය දිනෙක ජනාධිපති මාධ්‍ය නිවේදනයක්‌ නිකුත් කර තිබුණා, එය කියවලා බැලුවමත්, හිටපු ජනාධිපතිගේ මාධ්‍ය නිවේදනය කියවලා බලපුවමත් එකම වචන ටික තමයි තිබුණේ අත්සන් දෙක තමයි දෙවිදිහකට තිබුණේ.

එදා දෙන්නම කිව්වා හම්බවුණේ නැහැ කියලා. නමුත් දැන් වෙනකොට සාක්‍ෂි තිබෙනවා අපට මේ දෙන්න හම්බවුණා කියලා. ජවිපෙ නායකයොත් මේ ගැන කිව්වා. මේක දැඩි චෝදනාවක්‌. ඒකට නිසි පිළිතුරු අපට ජනාධිපතිවරයාගේ පාර්ශ්වයෙන් ලැබුණේ නැහැ. ඒ නිසා අපට දැඩි සැකයක්‌ මතුවෙනවා අපි විසින් පත්කරපු ජනාධිපතිවරයා මේ වෙනකොට හොර සාකච්ඡා කරනවාද කියලා මේ ගැන හරියට කිව යුතුයි.

ඒ නිසා අපි මේ වෙනකොට බොහෝ සෙයින් කලබල වෙලා තිබෙනවා වත්මන් ජනාධිපතිවරයාගේ මේ ක්‍රියාකලාපය ගැන. ඒත් මහින්ද - මෛත්‍රී එක්‌වුණා කියලා ඉදිරි මහ මැතිවරණයේදී එජාපය ලබන ජයග්‍රහණය වළක්‌වන්න බැහැ.

නමුත් අපට දුකක්‌ තියෙනවා මෛත්‍රීපාල සිරිසේන මහතාගේ ලැඡ්ජා නහර කපලාද කියලා, ඔහුගේ දේශපාලන න්‍යාය පත්‍රය වෙනුවෙන් ලක්‍ෂ 62 ක ඡන්දදායකයන් ප්‍රමාණයක්‌ ඡන්දය දුන්නේ මහින්ද පරද්දවන්නයි. ඒ ජනතාව මෛත්‍රීපාල සිරිසේන මහතා විසින් අමතක කළාද කියලා මට අහන්න වෙනවා.

තමන්ගේ පක්‍ෂය රටට වඩා ලොකුයි කියලා ජනාධිපතිතුමා හිතනවා නම් ඒක දැවැන්ත ප්‍රශ්නයක්‌. ලක්‍ෂ 62 ක්‌ ඡන්දය දුන්නේ මේ රටට මහින්ද එපා කියලායි. ඒක වත්මන් ජනාධිපතිතුමා අමතක කරලා නම් මේ රටට විශාල විනාශයක්‌ ඇති කරාවි.

අපි ජනාධිපතිතුමා ගැන විශාල විශ්වාසයක්‌ තබාගෙන හිටියා. ඔහුගේ ජයග්‍රහණය වෙනුවෙන් එජාපය බොක්‌කෙන්ම වැඩ කළා. දැන් අපි දකිනවා ඔහු බොහොම ගරු ගාම්භීරව උත්සවවලට යනවා. පාරේ තොටේ ඇවිදිනවා ඔහුට පොඩ්ඩක්‌ හරි අමතක නම් කවුද ඔතනට ගෙනාවේ කියලා ඔහුට දිට්‌ඨධම්ම වේදනීය කර්මය පළදෙන්න ඉඩ තිබෙනවා.

මොකද මහින්ද රාජපක්‍ෂ මහතාගේ ඒකාධිපති වියරුව ගැන, පවුල් පාලනය, හොරු ආරක්‍ෂා කරපු හැටි, ලැම්බෝගිනි, අශ්වයෝ ගැන තමයි මෛත්‍රීපාල සිරිසේන මහතා කතා කළේ. ඔහු තමයි කිව්වේ මහින්දව පරාජය කරන්න ඕනේ ඇයි කියලා. එහෙම කියපු මෛත්‍රීපාල සිරිසේන මහත්තයාට නැවතත් මහින්ද ශ්‍රීලනිපයෙන් දේශපාලනයට ගේන්න පුළුවන් වුණොත් එය මේ රට අමු අමුවේ පාවාදෙන්න ගනු ලබන තීන්දුවක්‌ ලෙසයි සලකන්නේ.

මේ රටට විශාල වෙනසක්‌ ඇති කරන්න මාදුළුවාවේ සෝභිත හිමියන් විශාල සේවාවක්‌ කළා. උන්වහන්සේ කියන්නෙත් වත්මන් ජනාධිපතිතුමා නිර්පාක්‍ෂික වෙන්න ඕන කියලා. හදිසියේවත් මහින්ද රාජපක්‍ෂ දින්නානම් සිරිසේන ජනාධිපතිගේ මුළු පවුලම අද හිරේ.

විලි ලැඡ්ජාව කියන දෙය අපට නම් තිබෙනවා. නමුත් අපි හිතුවේ නැහැ මෛත්‍රීපාල සිරිසේන මහතා මෙච්චර ඉක්‌මනට ලැඡ්ජා නහර කපා ගනීවි කියලා.

හැබැයි ජනාධිපතිවරයා තමන් බලයට ගේන්න කටයුතු කළ කණ්‌ඩායම අමතක කළොත් ජනාධිපති කාල වකවානුව ගැනත් තීරණයක්‌ ගන්න වේවි.

මහින්ද රාජපක්‍ෂ මහතා කියනවා දැන් පන්සල් ගානේ ගිහින්, අපේ රජය ගහපු පදයකුත් නැහැ බෙරේ පළුවකුත් නැහැ කියලා. අපි බෙරේ පළු ගහන්න ගියෙත් නැහැ. බෙරේ ඔළුව උඩ තියාගන්න ගියෙත් නැහැ. අපි කළේ මහින්ද රාජපක්‍ෂ තුනෙන් දෙකක බලයකුත් තියාගෙන කරන්න බැරි වුණු දේ රනිල් වික්‍රමසිංහ මහත්මයා සුළුතර ආණ්‌ඩුවකින් කරලා පෙන්නුව එක තමයි අපි ගහපු බෙර පදය.

මහින්ද රාජපක්‍ෂ මහතා 2005 දී ජනාධිපති ලෙස පත්වෙලා තමන්ගේ ප්‍රථම සංවර්ධන ව්‍යාපෘතිය ක්‍රියාත්මක කරන්න අවුරුදු දෙකක්‌ ගියා. ඒ කියන්නේ දින 600 ත් පැන්නා. දින 100 දී අපි කිව්වේ රටට හෙණයක්‌ වෙලා තිබුණු 18 වැනි සංශෝධනය වෙනුවට 19 වැනි සංශෝධනය ගේනවා කිව්වා. අපි ඒක ගෙනාවා.

දැන් හිටපු ජනාධිපති එනවා බදුල්ලට. ඔහු ඩිලාන් පෙරේරා මහතාගේ නිවසේ පවත්වන සව් දන්සලකුත් විවෘත කරන්න යනවා. තව ගමකට ගොස්‌ උත්සවයකටත් යනවා. මෙහෙම කරන්නේ බලලෝභිත්වය නිසායි. ඔහුගේ එකම ෙච්තනාව තමයි කොහොම හරි බලයට ඇවිත් මෛත්‍රීපාල ජනාධිපතිව වට්‌ටලා කොහොම හරි නැවත බලය ලබාගෙන පළිගැනීම. එයයි ඔහුගේ අභිප්‍රාය වෙලා තිබෙන්නේ. මේ දෙය තේරෙන්නේ නැතිනම් වත්මන් ජනාධිපතිට අපිට කරන්න දෙයක්‌ නැහැ. ඔහු හොරු කිහිප දෙනකුට රැවටෙන්න යන්න හදන්නේ.

මහින්ද මහත්තයා එනවා කියන්නේ අර හොරු ටිකත් ඔහුත් එක්‌ක එනවා. මෛත්‍රී ජනාධිපතිතුමා අර එදා වේදිකාවල බැනපු හොරු ටිකම තමයි ආයෙත් ළංකරගන්න හදන්නේ. ඒ නිසා අපි එකක්‌ කියනවා. 1988 න් පස්‌සේ මේ රටට ජාත්‍යන්තර නායකයෙක්‌ ආවේ නැහැ. ඉන්දීය අගමැති මේ රටට ආවේ රටේ විශ්වසනීයත්වයක්‌ ඇතිවෙලා තිබෙන ගෞරවයටයි. මේවා ජනාධිපතිතුමා අමතක කරනවා නම් එතුමාට වෙන්නේ මහින්ද මහත්තයාට වුණාට වැඩියෙන් විශාල ජාත්‍යන්තර පිළිකුල් කිරීමක්‌.

එහෙම තිබිලාත් ඇයි ජනාධිපති මෙහෙම හොර සාකච්ඡා පවත්වන්නේ. එහෙම සාකච්ඡා කරලා හමුවුණේ නැහැ කියලාත් කියනවා. මොකක්‌ද මේ ගහන්න යන හොර ගේම් එක. මේවා ගැන ජනාධිපති පැහැදිලිව රටට කියන්න ඕන. අපි එකක්‌ පැහැදිලිව කියනවා. මහින්ද මහත්තයායි මෛත්‍රී මහත්තයයි එකතුවුණොත් ඉදිරි මහ මැතිවරණයෙන් පරදින පැරදිල්ල එතුමන්ලාට සොයාගන්නවත් බැරිවේවි. මෙච්චර හොරු ගැන කියලා නැවතත් එම හොරු එක්‌ක එකතුවෙන්න පුළුවන් නම් ඒ හොරා කම්බහොරා කියලා ජනතාව තේරුම් ගනීවි.

මහින්ද මහත්තයා දැන් රටේ සංවර්ධනය ගැන නහයෙන් අඬනවා. ඔය මහලොකු සංවර්ධනයක්‌ කළාද කරපු සංවර්ධන ටික තමයි ඔහු හදපු ගුවන්තොටුපළ, වරාය, නෙළුම් පොකුණ, ක්‍රීඩා පිටිය. ඔය වගේ රටේ ආර්ථිකයට කිසිම සහයෝගයක්‌ දෙන්නේ නැති කොන්ක්‍රීට්‌ විතරක්‌ දමපු සංවර්ධනය ගැනයි එතුමා කතා කරන්නේ. ඒ හැම එකකම එතුමා තමාගේ නම දා ගත්තා. එහෙම නම් එජාපයත් ඔහොම කළා නම් ඇතුලත්මුදල් මහපොළ, ප්‍රේමදාස දිවා ආහාරය, ප්‍රේමදාස නිල ඇඳුම්, රනිල් වික්‍රමසිංහ අධ්‍යාපන පීඨය, රනිල් වික්‍රමසිංහ තරුණ සේවා සභාව, ගාමිණී දිසානායක විදුලි බලාගාර, ගාමිණී මහවැලිය, ඡේ. ආර්. ජයවර්ධන පෙළ පොත්, ඒ වගේම කන්නන්ගර පාසල් කියලා අපිත් නම් දාගත්තා නම් නියමෙට තියෙයි.

ඒ වගේම මේ රටේ ලක්‍ෂ 62 ක්‌ ඡන්දේ ප්‍රකාශ කළේ මහින්ද එපා කියලා. නැතුව මෛත්‍රී ජනාධිපතිගේ මහලොකු දර්ශනයක්‌ නිසා නොවෙයි. හැබැයි මහින්ද ඕන කියලා වත්මන් ජනාධිපතිට හිතෙනවා නම් එදාට මේ රට තුළ ඇතිවෙන ව්‍යාකූලභාවයට මෛත්‍රීපාල සිරිසේන මහත්තයා වගකිව යුතුයි කියලා කියන්න ඕනෑ.

එහෙම බයක්‌ අපිට දැනෙනවා. මම තවම මෛත්‍රීපාල සිරිසේන මහත්තයව 60% ක්‌ විශ්වාස කරනවා. අනෙක්‌ 40% ක සැකයක්‌ මට තිබෙනවා. මෛත්‍රීපාල ජනාධිපති මහින්ද රාජපක්‍ෂ නැවත ගෙනාවොත් මම ආයෙත් දේශපාලනය කරන්නේ නැහැ කියලා කියන්න ඕන. මෛත්‍රීපාල ජනාධිපති මහින්ද සමඟ සාකච්ඡා කිරීම කරන ෙද්‍රdaහීකමක්‌ කියලයි මා සලකන්නේ. ඒ ෙද්‍රdaහිකමට අපට ඉඩදිය නොහැකියි.

අපි කියනවා පක්‍ෂය ආරක්‍ෂා කරගන්න ඒකට කමක්‌ නෑ. ඒත් මහින්දව ඕන කියලා කියනවා නම් අපි ඒකට ලැඡ්ජා වෙනවා.